ILOILO CITY- Handa si Iloilo City Lone District Representative Julienne ‘Jamjam’ Baronda nga manilhig sa dalan agud mapakita ang iya sinseridad sa pagbaton sang penalidad nga community service bangud sa paglapas sa health protocol kasunod sang pagtambong niya sa inagurasyon sang BFP substation sa Alta Tierra Village, Jaro, Iloilo City.
Sa interview sang Bombo Radyo kay Baronda, iya ginpahayag nga himuon niya ini sang sekreto nga indi kinahanglan nga i-post pa ini sa social media agud ipakita- kita sa publiko.
Samtang, gin-athag naman sang kongresista nga pagkabaton pa lang niya sang sulat halin kay Mayor Treñas sang Lunes, ginsugudan niya gilayon ang pagrender sang community service.
Suno kay Baronda, nag-organisa siya sang community kitchen kag adlaw-adlaw nga nagpanagtag sang foodpacks sa mga medical frontliners nga assigned sa vaccination centers sa syudad.
Pahayag ni Baronda, personal niya nga kwarta ang iya gin-gamit para diri.
Plano naman ni Baronda nga padayunon sa gihapon ang iya community service kag imbitaron man niya si Candido nga magpatigayon sang community clean- up sa mga lugar sa syudad nga may mataas nga kaso sang dengue hemorrhagic fever.
