𝗜𝗟𝗢𝗜𝗟𝗢 𝗖𝗜𝗧𝗬 — Ginatinghuwaan sang Iloilo City Schools Division nga masolbar ang nagapanguna nga problema ilabi na nga nagsugod na bukas ang klase subong nga adlaw.
Sa interview sang Bombo Radyo kay Dr. Ma. Luz Delos Reyes, Iloilo City Schools Division, iya ginpahayag nga isa sa mga ginapangutubang nga problema sang mga buluthuan amo ang kakulangan ang classrooms.
Suno kay Delos Reyes, naka- disseminate na ang talatapan sa tagsa ka school heads agud magpatawag sang community involvement kaangay sang pagpatigayon sang pagpanglimpyo agud masiguro ang safety sang mga estudyante.
Ginpahayag man sini nga nagpasakop man ang Bureau of Fire Protection (BFP) kag Philippine National Police (PNP) sa pagbukas sang klase agud mapabilin ang kalinong kag katawhay.
Tuyo man sang talatapan nga i-implementar ang rescheduling sang senior high school, kon sa diin, may yara sang ibutang sa aga nga klase kag may yara man sa hapon nga klase bangud man sa wala pa matapos nga konstruksyon sang pila ka mga hulot-klasehan.
Ginplano man nga mag-procure sang mga insecticide sa tagsa ka eskwelahan agud nga mabato-an ang pagpanghangkat sang pagtaas sang kason sang dengue.
Nagpanugyan man si Delos Reyes sa mga ginikanan nga pasuksokan ang mga kabataan sang malaba nga panapton kaangay na lamang sang long sleeves kag malaba nga medyas agud malikawan nga makagat sang lamok.
