ILOILO CITY- Magapatuman sang adjustment ang Iloilo City Traffic Management Unit may kaangtanan sa patigayunon nga ikaduha nga adlaw sang tagtaganay sang ayuda sang Department of Social Welfare and Development sa Iloilo Sports Complex sa Magsaysay Village, La Paz, Iloilo City.
Kasunod ini sang pagpugok sang trapiko sa una nga adlaw nga nagtuga sang huol sa mga motorista kag sa publiko.
Sa interview sang Bombo Radyo kay retired Police Colonel Uldarico Garbanzos, pinuno sang unit, iya ginpahayag magadugang sila sang personnel agud nga madumala sang maayo ang dalagan sang trapiko.
Suno kay Garbanzos, may yara man sang Plan A kag Plan B nga ipatuman.
Sa Plan A, tugutan lang anay nga mangin two-way ang dalan pasulod sa Magsaysay Village apang kun magdamo na ang salakyan, ipatuman ang Plan B ukon himuon nalang ini nga one-way.
Nahibaluan nga ang tagtaganay sang ayuda ang nagalakip sang ₱2,000 halin sa Assistance to Individuals in Crisis Situation sang Department of Social Welfare and Development kag ₱3,000 halin naman sa Ayuda para sa Kapos ang Kita Program ukon AKAP.
Ginabanta nga yara sa 7,000 ka mga indibidwal halin sa probinsya kag siyudad sang Iloilo ang makabaton sang ayuda subong nga adlaw nga pareho man sa numero nga nakabaton kahapon.
Sa kabilugan, kapin sa 13,500 ang benepisyaryo sa duha ka adlaw nga tagtaganay sang ayuda.
