ILOILO CITY–Wala nagpang alang-alang si Iloilo City Treasurer Jinny Hermano nga ipakigbato ang iya panindugan nga indi pagpa-inan sang pondoang excess job hire sang Iloilo City Government.
Sa ginpatigayon nga legislative inquiry, hugot nga ginpanindugan ni Hermano nga indi paghatagan sang sweldo ang mga sobra nga job hire.
Ini bangud nga suno kay Hermano, indi problema ang pondo sa baylo wala sang ‘appropriation’ ukon cash back-up.
Bilang City Treasurer, ginpahayag ni Hermano nga iya lamang nga ginasunod kun ano ang nakasaad sa layi agud nga indi man siya maigu-an sa ulihi.
Gindayaw naman ni Iloilo City Councilor Plaridel Nava, majority floor leader kag chairman sang Committee on Appropriations sa konseho, si Hermano bangud sa iya panindugan sa pihak sang mga pagpakamalaot.
Ginpahayag ni Nava nga kinahanglan sang gobyerno ang mga empleyado nga kaangay ni Hermano nga maisog kag may panindugan. Sa pihak sini, ginpahayag sang konsehal nga ang masobra sa P400,000 kag masobra sa P1 million nga pondo sa bulan sang Enero kag Pebrero para sa kapin 200 ka job hires, ang indi bastante nga rason agud nga matay-og ang City Government.
Bilang abogado, ginpahayag ni Nava nga bisan ang mga layi ang may yara man sang ‘exception’ kun kaisa, depende sa sitwasyon.
Kun tani suno kay Nava, mapangitaan sang paagi nga maswelduhan ang mga job hire nga naghatag sang serbisyo sa syudad.
