Magapadala ang Iloilo City Traffic and Transportation and Management Office (TTMO) sang tag-duha ka personnel sa kada voting center sa syudad sang Iloilo para sa Mayo 12 nga eleksyon.
Sa interview sang Bombo Radyo kay Retired Police Colonel Uldarico Garbanzos, head sang talatapan, iya ginpahayag nga napatigayon naman ang send-off ceremony sa ila mga katapo nga ipadala sa 66 voting centers nga may 417 clustered precincts.
Magluwas sa traffic personnel, may iga-deploy man nga myembro sang Public Order and Safety Management Office (POSMO) bangud may mga manugbaligya man nga gintugutan sa mga eskwelahan kadungan sang eleksyon.
Pagkatapos sang lunch time sa Lunes, ipatigayon ang road closure sa Mabini Street — halin sa dalan General Luna pakadto sa dalan Delgado — para sa seguridad sa final canvassing sa Jubillee Hall.
Sang nagligad nga semana sang ginpatigayon sang opisina ang onsite inspection sa mga polling center. Ini agud ma-check ang drop-off areas kag ang reserved parking kag makapakighinun-anon man sa school personnel para masigurado nga matalunsay ang dalagan sang piniliay.
