𝗜𝗟𝗢𝗜𝗟𝗢 𝗖𝗜𝗧𝗬 — Plano nga ipatawag sang Iloilo City Women and Children Protection Desk (WCPD) ang mga kalalakihan nga naglampos sang sanga sang kahoy kag nagtuyo nga mangawat sa isa ka pamatan-on nga kuntani magalagaw-lagaw lang man sa Iloilo Esplanade.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office (ICPO), iya ginpahayag nga ipatawag ang mga imbolbado nga kabataan agud nga mahatagan sang nagakaigo nga leksyon, counseling, kag ma-edukar ang mga ini.
Suno kay Sangrines, na-identify na sang Lapaz Police Station ang mga kabataan kag gina-asikaso na lang nga maistorya ang mga ini kaupod ang ila nga mga ginikanan.
Ginpahayag man sini nga kinahanglan nga ipaathag sa ila ang pagsulundan sang syudad, kaangay na lamang sang curfew.
Nagpanawagan man ini sa mga barangay officials sa kabarangayan sang syudad nga giyahan kag bantayan sang maayo ang mga menor-de-edad nga nagaliho-liho sa oras sang curfew.
