ILOILO CITY – Nagahulat na lamang sang mando ang Iloilo City Social Welfare and Development Office may kaangtanan sa ihatag nga bulig sa mga small-scale rice retailers nga apektado sang price cap.
Ini ang kasunod sang pahayag ni Social Welfare Secretary Rex Gatchalian nga ginmandu-an siya ni President Ferdinand Marcos Jr. nga gamiton ang Sustainable Livelihood Program sang ahensya.
Ang ahensya ang may yara sang nabilin nga ₱5.5 billion nga budget nga mahimo gamiton.
Sa masunod nga semana na posible nga mahatag ang ayuda nga nagadangat sa ₱15,000.
Sa interview sang Bombo Radyo kay Teresa Gelogo, pinuno sang Iloilo City Social Welfare and Development Office, iya ginpahayag nga ginahulat pa nila ang implementing rules and regulations nagikan sa central office.
Suno kay Gelogo, diri pa mahibaluan kun ano ang mangin papel sang mga local government units.
Posible suno sa iya nga ang local government unit ang magabulig sa pag-assess kag paglista sang mga pangalan sang apektado.
Mahimo man suno sa iya nga may counterpart ang mga banwa ukon syudad sa ihatag nga ayuda.
