Iloilo District 3rd Representative Lorenz Defensor, ginakonsidera nga mangin venue ang Iloilo sa paghiwat sang legislative inquiry may kaangtanan sa kontroberysal nga Ungka flyover

Iloilo – Ginahulat nalang nga matapos ang curing period sa ginahimo nga road widening sa idalom sang Ungka flyover.

Kun balik-balikan, nagpasalig ang Department of Public Works and Highways Region 6 nga matapos ang road widening antes ang Pebrero 14 agud mangin solusyon sa paghagan-hagan sang trapiko.

Sa interview sang Bombo Radyo kay Pavia, Iloilo Sangguniang Bayan Member Pyt Trimañez, chairman sang Committee on Transportation, iya ginpahayag nga may yara lamang sang isa ka lane nga sarang maagyan sang mga motorista.

Suno kay Trimañez, nahagan-hagan na ang pagpugok sang trapiko bangud pa-diretso kag wala sang U-turn slot nga ginasundan ang mga motorista.

Nahibaluan nga may naka-deploy nga mga traffic enforcers sa intersection sang Sen. Benigno Aquino Avenue agud mag-manage sang trapiko.

Sa subong, nagapanawagan ang natungdan sa Department of Public Works and Highways Region 6 nga magpahamtang sang sidewalk agud may maagyan ang mga tawo.

Kaangot diri, ginpahayag man ni Trimañez nga gin-suspend naman ang construction sang Aganan flyover bangud nag-agi man ini sa kaangay nga proseso kag design sang Ungka flyover.