ILOILO CITY – Padayon ang pagpakig-angut sang Iloilo District Jail Dormitory sa Barangay Nanga, Pototan, Iloilo sa Pavia Municipal Police Station may kaangtanan sa naggwa nga impormasyon nga may inmates sa facility nga amo ang nagasuplay sang iligal nga droga.
Sang damlag lang, nakuhaan sang halos tunga sa milyon ka pesos nga balor sang iligal nga droga ang isa ka lalaki sa Purok 4, Cabugao Norte, Pavia kun sa diin, ginpahayag sini nga ang inmate sa Iloilo District Jail Dormitory ang ginakuhaan niya sang droga.
Sa interview sang Bombo Radyo kay Jail Chief Inspector Denver Beltran, jail warden sang facility, iya ginpahayag nga ang iban nga mga pangalan nga ginhatag sang kapulisan ang madugay na nga gin-release.
Dugang pa niya, padayon man ang pagpatuman sang programa sang facility agud nga malikawan nga ma-angut ang mga inmates sa iligal nga aktibidad.
Lakip na diri ang pagpatigayon sang random kag mandatory drug testing sa tanan nga mga inmates kag personnel sa facility.
Sang nagligad nga semana, duha ka mga inmates ang nagpositibo sa iligal nga droga.
Ang mga ini ang ipaidalom liwat sa test pagkatapos sang tatlo ka bulan.
