Ginbida sang Filipino-British singer-songwriter nga si Beabadobee ang Iloilo sa official music video sang iya bag-o nga love-themed single nga Glue Song.
Sa music video, makit-an ang katahum sang Port San Pedro amo man ang kaanyag sang kaumhan sa hometown sang 22-anyos nga singer nga Beatrice Kristi Laus ang matuod nga pangalan.
Ginsulat niya ini samtang naga-tour sa Asia kag Australia. Inspired ini nga kanta sa iya bag-o nga relasyon kag nagaistorya man sa isa ka “pure and blissful” nga sahi sang gugma.
Upod niya sa pag-trabaho sa amo nga music video ang iya boyfriend nga si Jacob Erland nga isa man ka guitarist kag producer.
Nahibaluan nga nabun-ag si Beabadobee sa Iloilo apang nagdaku sa London. Una siya nga nangin popular bangud sa iya kanta nga Coffee nga nangin global hit matapos gin-reinterpret sang rapper nga si Powfu.
Sa edad nga 22, may yara na siya sang duha ka albums kag lima ka EPs sa iya nga pangalan kag may yara man sang nominasyon sa BRIT Award nga amo ang pinakamataas nga pop music honours sa Britanya. Sang Septyembre, nagpatigayon siya sang iya una nga show sa Manila. ##
