𝗜𝗟𝗢𝗜𝗟𝗢 — Ginaduso ni Iloilo First District Board Member Jo-Ann Germinanda nga magpatuman sang committee investigation ang Sangguniang Panlalawigan sang Iloilo kaangot sa pagpasirado ni Vilma Sta. Cruz Getuya, iloy ni San Joaquin Vice Mayor Marvigrace Getuya Lago sang daan nga San Joaquin Mother and Child Hospital.
Sa interview sang Bombo Radyo kay Board Member Germinanda, iya ginpahayag nga tuyo sang imbestigasyon nga masabat ang mga issue tuhoy sa pag-take over sang pamilya Getuya sang hospital apisar nga ini ang ginapanag-iyahan na sang gobyerno.
Suno kay Germinanda, paga-imbestigaran man ang indi paghulag sang mga kapulisan sang San Joaquin Municipal Police Station bangud nagaguwa nga sila ang nagpabaya apisar nga may nagluntad nga indi pag-intindihanay sa pamlya Garin kag Getuya.
Ginpahayag man sini nga ilakip sa imbestigasyon ang punong barangay nga nag-certify sang nasambit nga hospital nga ini ang wala na ginagamit apisar nga naga-gana sa gihapon ang Radiology Department sini.
Nahibaluan nga ginkasugtan naman sang Sangguniang Panlalawigan nga i-refer ang committee investigation sa Committees on Health and Sanitation as Lead Committee, Public Order and Security and Justice, Human Rights and Good Government.
Nagpanindugan naman si Iloilo 4th District Board Member Domingo Oso Jr. nga indi lang dapat anay pag-imbestigaran sang Sangguniang Panlalawigan sang Iloilo ang nasambit nga issue bangud ini nga away ang sa tunga sang pamilya Getuya kag Garin.
Suno kay Oso, kinahanglan anay nga maresolba ang issue sa tunga sang Garin kag Getuya antes magsulod ang ginaduso nga imbestigasyon.
Wala naman napunggan nga magsu-ay ang mga Board Members nga ginlakipan nanday Iloilo First District Board Member Marcelo Valentine-Serag, Iloilo Second District Board Member June Mondejar, kag Iloilo 4th District Board Member Domingo Oso Jr. bangud man sa ginaduso nga imbestigasyon ni Iloilo First District Board Member Jo-Ann Germinanda.
