ILOILO CITY – Hugot nga ginatutukan sang COVID Team sang Iloilo City Government ang Iloilo Fish Port Complex kag mga call centers.
Ini ang kasunod man sang pagtaas sang kaso sang local transmission sang Coronavirus disease 2019 (COVID-19).
Sa exclusive interview sang Bombo Radyo kay Mr. Jeck Conlu, tagpamaba sang COVID Team, iya ginpahayag nga sa subong, nagapadayon ang ila contact tracing kag padayon nga nagasaka ang indigenous cases.
Suno kay Conlu, madasig nga nagalaton ang COVID-19 sa Iloilo Fish Port Complex bangud wala nagapatuman sang physical distancing ang mga nagabulante sang isda.
Halos tanan man nga mga barangay sa syudad ang may nagabaliga sang isda rason nga madasig nga nagtaas ang kaso sang COVID-19.
Sa bahin naman sang mga callcenter agents, ginpahayag ni Conlu nga air conditioned ang ila lugar kag sa tion nga mag-coffee break ang mga ini, wala sila naga physical distancing rason nga madasig ang mga ini nga naglatnanay sang kagaw.
