ILOILO CITY – Ginbuksan na epektibo subong, Agosto 20, ang Iloilo Fish Port Complex matapos ginsirado bangud sa mataas nga kaso sang COVID-19.
Sa interview sang Bombo Radyo kay Dr. Justo Anaquita, spokesperson sang Iloilo Fish Port Complex, iya ginpahayag nga ang trading ang maga-umpisa 1:00 sa hapon tubtub 6:00 sa kasisdmon.
Suno kay Anaquita, nangin matalunsay ang pagginawi sa sulod sang fish port kun sa diin mismo si Iloilo City Mayor Jerry Treñas ang nagpanguna sa inspection.
Ginpahayag ni Anaquita nga madamo ang bentaha sang limitado nga oras sang pagbaligyaanay kun sa diin lakip diri amo nga makakinot sa kuryente, may tion pa agud nga makapaninlo sa sulod kag makapahuway sang temprano ang traders lakip na ang mga nagapamakal.
Samtang, kumbinsido naman si Mayor Jerry Treñas sa iya naobserbahan kadungan sang inspection nga iya mismo ginpangunahan.
Suno kay Treñas, ginasunod gid ang minimum health protocol kasubong sang pagsuksok sang face mask kag face shield kag ang physical distancing.
Sa subong suno sa alkalde, nagnubo na ang na record nga COVID-19 cases sa syudad apang indi dapat magkampante kag sa baylo, nagakadapat nga padayunon ang ginapatuman nga preventive measure.
