ILOILO CITY – Nagakahangawa ang Iloilo Fish Producers Association nga maglapta ang bunker fuel sa fish pond nga ila palangabuhian.
Sa interview sang Bombo Radyo kay Tomas Hautea, Presidente sang Iloilo Fish Producers Association, iya ginpahayag nga posible maapektuhan ang ila fish pond bangud naga-diretso sa ila ang direksyon sang tubig dagat sa tion nga ini ang magtaob.
Suno kay Hautea, may yara sang 2,000 ektarya sang fish pond kag tanan ang halos may yara sang buhi nga isda gani ini ang iya ginakakulbaan.
Pahayag niya, katapusan kuntani sang Hulyo ang tion sa paghaw-as sang isda.
Dugang pa sang natungdan, indi na niya luyag pa nga maliwat ang natabo sang 2006 sa diin bangud sa oil spill sa Guimaras, duha man ka tuig nga wala sila sang produkto nga isda.
