Napuno sang Ilonggo-Chinese community ang Iloilo Freedom Grandstand sa ginpatigayon nga Chinese New Year Celebration sang city government.
Sa interview sang Bombo Radyo kay Iloilo City Mayor Jerry Treñas, iya ginpabugal nga tuman na ka layo ang nadangtan sang pag-abyanay sang mga Ilonggo kag Chinese sa syudad.
Suno kay Treñas, sa tagsa ka tuig nga pagselebrar sang Chinese New Year, gadako man ang kahiwatan.
Ginpasalamatan man sang alkalde ang Chinese-Filipino community ukon Tsinoys nga nagbuylog sa amo nga kahiwatan sa sulod sang masobra 20 na ka tuig.
Nagpasalamat man si Treñas Iloilo Festivals Foundation, Inc. (IFFI) nga ginapangunahan nanday Rito Carlos L. Peña kag president Allan Ryan L. Tan; kag Fr. Joseph Raymund Patrick Sanchez, SJ, ang taskforce chairperson kag presidente sang sini nga tuig kag host, ang Ateneo de Iloilo-Santa Maria Catholic School, subong man sang iban pa nga Chinese schools.
Gin-abi-abi man sang natungdan ang presensya sang Filipino singer-songwriter kag proud Ilonggo nga si Mr. Jose Mari Chan.
Nahibaluan nga indi magnubo sa 15,000 ka mga Chinese Filipinos ang naga-istar subong sa Iloilo City.
