ILOILO CITY – Ginhingyo ni Iloilo Governor Arthur Defensor, Jr. kay Department of Transportation Sec. Jaime Bautista nga kun mahimo, ma-expand pa ang Iloilo International Airport sa banwa sang Cabatuan.
Sang damlag lang, nagpakigkita si Gov. Defensor kay Sec. Bautista sa diin iya ginpresentar ang kinahanglanon sang probinsya nga mapalapad kag mapadako pa ang facility bangud sa pagtaas sang numero sang pasahero kasunod man sang madasig nga development sang syudad kag probinsya sang Iloilo.
Sa interview sang Bombo Radyo kay Gov. Defensor, iya ginpahayag nga indi na makaigo ang mga pasahero sa terminal sa airport bangud apisar antes pa man ang pandemya, nagagutok na ang mga tawo.
Pahayag sang gobernador, gintuad ni National Economic and Development Authority VI Regional Director kag Regional Development Council VI Vice Chairperson Engr. Arecio A. Casing Jr. nga as of September 2023, ang unsolicited proposal nga ginpasa sang Prime Asset Ventures, Inc. ang under evaluation na sang Department of Transportation sang Civil Aviation Authority of the Philippines.
Ang ginaduso nga expansion ang nagalakip sang pag-upgrade sang passenger terminal building, construction sang apron adjacent sa amo man nga building, installation sang required equipment para sa passenger services, kag modernization sang appurtenant facilities.
Ang expansion ang ipatuman sa idalom sang public-private partnership scheme.
Dugang pa sang gobernador, ginpahayag sa iya ni Secretary Bautista nga gina-target sang National Economic and Development Authority nga maka-issue sang approval sa first quarter sang 2024.
