ILOILO – Pabor si Governor Arthur Defensor Sr. nga ang Committe on Disaster Risk Reduction and Management sa Sanguniang Panlalawigan ang pagtumod kun bala nagakadapat nga ipaidalom sa State of Calamity ang probinsya sang Iloilo.
Sa interview sang Bombo Radyo kay Gov. Defensor, iya ginpahayag nga mas makapaayo nga ang komitiba nga ginapamunu-an ni Iloilo 1st District Board Member Marcelo Valentine Serag ang magatuon kag magatumod kun bala nagakadapat nga ideklarar ang State of Calamity.
Nakapasa naman suno kay Gov. Defensor sang report ang Provincial Disaster Risk Reduction and Management Office (PDRRMO) tuhoy sa natuga nga halit sang weak El Niño.
Kadungan sini, ginpahangop man sang gobernador ang ginatawag nga ‘mitigating measure’ nga isa sa mga ginakwestyon ni Serag.
Sa pagpaathag sang natungdan, ang ‘mitigating measures’ ang mahimo lamang ipatuman samtang na-eksperyensyahan ukon natapos na ang kalamidad.
Kun wala pa na-eksperyensyahan ang kalamidad, makabig ini suno sa gobernador nga ‘disaster preparedness’ ukon kahandaan.
