ILOILO – Liwat nga nagpangabay si Iloilo Governor Arthur Defensor Jr. sa publiko nga magpabilin sa sulod sang balay kun wala man lang sang importante nga kadto-an.
Ini ang may kaangtanan sa border restriction nga ginpatuman sang probinsya sang Iloilo bilang panagang sa coronavirus disease 2019.
Sa interview sang Bombo Radyo kay Gov. Defensor, iya ginpahayag nga kinahanglan sa subong ang pagpa-umod, sakripisyo kag kooperasyon sang bug-os nga probinsya ilabi na sa pagpatuman sang border restrictions.
Suno kay Defensor, lunsay mga delivery truck lamang nga may karga sang produkto ang mahimo nga makasulod sa probinsya apang kinahanglan man nga tsekyaron ang body temperature sang driver ukon sa sakay sang salakyan.
Padayon man nga nagapakig-angot ang gobernador sa Department of Health may kaangtanan sa testing kits bangud tubtob subong wala pa sang available sa Western Visayas.
