Iloilo Gov. Arthur Defensor Sr
ILOILO – Ginhikayan ni Iloilo Gov. Arthur Defensor Sr. si outgoing Iloilo 4th district Cong. Ferjenel Biron matapos nga nagwangal ini sa iya kapaslawan sa gubernatorial elections sa diin plano sini nga magpa recount.
Nahibaluan nga makaduha ka beses na nga nalutos si Biron sa pagpadalagan sini sa pagka gobernador.
Una nga nalutos si Biron sang nagpadalagan ini sa gubernatorial elections sang tuig 2013 sa diin nakasumpong sini si outgoing Iloilo Gov. Arthur Defensor Sr. kag liwat naman ini nga napierde sang tinalikdan nga May 13, 2019 midterm elections sa diin nakasumpong sini ang anak sang gobernador nga si Iloilo 3rd District Congressman kag subong governor elect Arthur ‘Toto’ Defensor Jr.
Sa interview sang Bombo Radyo sa gobernador, iya ginpaangid ang kapalaran ni Biron sa poem ukon tula nga ‘For dreams must die nga isa ka romantic novel nahanungod sa kabuhi nanday Jose Rizal kag Leonor Rivera kag ambahanon nga ‘The Impossible Dream’ ni Frank Sinatra.
Suno kay Defensor, posible nga matabo man kay Biron ang natabo kay the late US president Abraham Lincoln sa diin walo ka beses ini nga nalutos sang nagpadalagan antes napilian bilang presidente sang Estados Unidos sang tuig 1960.
Ginapahayag ni Defensor nga posible sa makapila ka beses nga pagpadalagan ni Biron sa pagka gobernador, madaog man ini sa ulihi.
Outgoing Iloilo 4th district Cong. Ferjenel Biron
Nagalibog man ang ulo sang gobernador kun sin-o ang nagsutsot kay Biron nga magpa recount.
Nagkadlaw man si Defensor bangud nagapati si Biron nga ang wala maisip nga 100,000 ka mga boto sang midterm elections ang i-credit sa iya.
Una na nga ginpahayag ni Biron nga may mga botante nga makapamat-ud nga siya ang ginboto sa balota apang sa paggwa sang resibo sa Vote Counting Machine, si Defensor na ang nakabutang.
Gindugang man niya mabudlay man i-reconcile ang resulta sang election sa resulta sang survey sa Random Access Consultants Inc. (RACI) sa diin consistent ini nga nagapangibabaw sa survey.
Samtang, sa interview sang Bombo Radyo, ginkadlawan lang ni Cong. Toto ang nangin tikang sang iya nalutos nga kasumpong.
Suno kay Cong. Toto , kaangay nga wala sang merito ang mga grounds ni Biron sa pag-file sang election protest.
