ILOILO – Ipabilin sa gihapon ang status quo sa probinsya sang Iloilo may kaangtanan sa pagpauli sang mga locally stranded individuals (LSIs), Returning Overseas Filipinos (ROFs) kag Authorized Persons Outside Residence (APOR).
Ini ang kasunod sang Resolution Number 101 nga ginpapanaog sang Inter-Agency Task Force (IATF) sa diin kaundan sini nga mapasimple ang travel requirements, protocols, kag procedures sa diin indi na mandatory ang swab test sa mga nagabyahe.
Sa interview sang Bombo kay Iloilo Governor Arthur Defensor Jr., iya ginpahayag nga makonsulta pa siya sa Regional IATF antes magpirma sang bag-o nga executive order kaangot sa mga ipatuman nga travel restrictions sa mga magapauli sa probinsya sang Iloilo.
Naghingyo man si Defensor, nga hatagan siya sang 72 hours agud matun-an ang iya resolution santo sa rekomendasyon sang Regional IATF.
Gin-ako man ni Defensor nga nagakahangawa siya nga posible magsaka ang kaso sang COVID-19 sa probinsya sang Iloilo kun pahalugan ang pagsulundan sa pagbyahe ilabi na ang mga nagahalin sa Metro Manila.
