Hugot nga nagpahanumdom ang gobernador sang probinsya sang Iloilo sa publiko nga indi magginutok kag magtumpok sa mga tourism destination kadungan sang selebrasyon sang Semana Santa.
Sa interview sang Bombo Radyo kay Iloilo Governor Arthur Defensor Jr., iya ginapahayag nga estable na ang mga kaso sang COVID-19 sa probinsya matapos ginpauntat ang pagsulod sang mga byahero sa Western Visayas nagikan sa National Captal Region bubble areas.
Suno kay Defensor, indi maayo nga bangud sa Holy Week, magatimbuok naman ang COVID-19 cases.
Pahayag sang gobernador, bukas ang tanan nga resort sa Semana Santa apang 50 percent lamang ang capacity sang mga tawo nga mahimo ma-akomodar.
Nagpanawagan man ang natungdan sa mga tag-iya kag personnel sang accomodation establishments sa Iloilo Province nga ipatuman ang tanan nga health protocol.
Magluwas diri suno kay Defensor, ginmaduan man niya ang mga Local Government Unit kag ang Philippine National Police agud i-monitor sang maayo ang mga resorts kadungan sang selebrasyon sang Semana Santa.
Samtang, ginkumpirma ni Defensor nga liwat siya nga magapagwa sang bag-o nga modified general community quarantine (MGCQ) Executive Order nga ipatuman sa Iloilo Province umpisa sa Abril 1.
