Nagapati si Iloilo Governor Arthur Defensor, Jr. nga mangin mabaskog nga kandidato si Anilao Mayor Lee Ann Debuque samtang nagapalapit ang 2025 midterm elections.
Ini ang ginpahayag sang gobernador kasunod sang pagdagsa sang mga pulitiko sa ila balay sa Mina, Iloilo kasunod man sang desperas sang kapiestahan sa amo nga banwa.
Sa interview sang Bombo Radyo kay Governor Defensor, iya ginpahayag nga madamo na sang mga lideres sa probinsya ang nagpabutyag sang ila nga suporta kay Debuque.
Suno kay Defensor, nagaumpisa pa lang kag malawig pa ang tyempo agud nga makilala ang iya tandem nga si Debuque.
Nagpanugyan man ang amay sang gobernador nga si former Iloilo Governor Arthur Defensor, Sr. nga sa kada boto nga yara ang iya anak, ilakip gid ang pangalan ni Debuque.
Nasiplatan sa nasambit nga kahiwatan ang magkasumpong sa pagka-alkalde sa banwa sang Miagao nga sanday Miagao Vice Mayor Dr. Macario N. Napulan kag incumbent Mayor Richard Garin.
Yara man ang mag-asawa nga Gorriceta nga sanday Iloilo 2nd District Representative Mike Gorriceta kag ang asawa sini nga si Dr. Kathryn Joyce Fermin-Gorriceta nga magapili sa congressional seat sa amo nga distrito.
