ILOILO – Nagpaguwa sang Executive Order si Iloilo Gov. Arthur Defensor Jr. may kaangtanan sa pagpatuman sang PLAN RT-PCR ukon Plan for Rehabilitation and Transformation of the Province of Iloilo to Catalyze Recovery.
Ini ang may kaangtanan sa ginapatuman nga Modified General Community Quarantine sa probinsya sang Iloilo tubtub sa Agosto 31.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga may yara lamang sang pila ka adjustment sa panibag-o nga Executive Order kun ipaanggid sa daan.
Suno kay Defensor, lakip sa mga adjustment amo ang pagpatigayon sang Reverse Contact Tracing sa tion nga may magpositibo sa COVID-19 kun sa diin sa barangay level pa lang, mas pasangkaron na ang monitoring agud nga mapahapos ang contact tracing.
Ginpahayag ni Defensor nga sa tagsa ka barangay, kinahanglan nga may yara sang monitoring agud mahibalu-an kun sin-o ang mga nagaguwa-sulod sa nasambit nga lugar sa baylo nga magsalig sa ginapatigayon nga contact tracing nga ginapatigayon sang municipal, city ukon provincial level.
Gin-athag man ni Defensor nga wala sang inter-municipal travel restrictions sa bug-os nga probinsya sang Iloilo apang kun halin naman sa iban nga probinsya, kinahanglan ang health declaration card.
Sa ekonomiya, indi mahinago suno sa natungdan nga may yara sang natuga nga economic losses ang ginapatuman nga community quarantine.
May kaangtanan diri, nakasaad sa Executive Order sang Gobernador nga magpatigayon sang programmatic intervention agud nga mabawi ang kantidad nga nadula sa kita sang probinsya.
Sa idalom sang Modified General Community Quarantine, ginapahanugutan na suno sa natungdan ang pagpatigayon sang public events apang ini ang limitado kag kinahanglan sundon ang minimum health standards.
Magluwas sa face mask, mandatory man ang pagsuksok sang face shield sa tion nga magsakay sa pampubliko nga salakyan lakip na ang pagsulod sa tagsa ka merkado publiko.
Isa man sa ginatutukan sang provincial government amo ang psychosocial needs sang mga Ilonggo bangud sa ginapatuman nga community quarantine.
