ILOILO CITY – Nagpasalig si Iloilo Governor Arthur Defensor Jr. nga handa nga magbulig ang provincial government sa mga kabanwahanan nga may may madamo nga kaso sang dengue ilabi na ang mga may surge sang kaso.
Sa interview sang Bombo Radyo kay Defensor, iya ginpahayag nga sa section 3 sang Executive Order (EO) No. 270 nga naga-implementar sang mas ginpasangkad nga dengue surge prevention kag management measures, ang provincial government pinaagi sa Iloilo Provincial Health Office (IPHO) ang magahatag sang suporta sa local government units (LGUs) sa healthcare personnel, facilities, equipment, kag supplies.
Sandig sa latest nga rekord sang Iloilo Provincial Health Office, may yara na sang 568 ka dengue cases sa probinsya as of June 18, mas mataas sang 108 sa 460 nga na-rekord sang nagligad nga Hunyo 11.
Sa sini nga numero, nagapabilin nga anum ang patay.
Yari ang mga gintumod nga banwa nga may pinakadamo nga mga kaso: San Joaquin nga may 118; Guimbal nga may 57; Tubungan nga may 52; Miagao nga may 34; Oton nga may 25; Estancia nga may 24; Dumangas nga may 20; Pototan kag Tigbauan nga may 19; Duenas nga may 15; kag Balasan kag Leon nga may tag-12.
Napabilin naman sang Anilao kag San Rafael ang rekord nga may zero case sang dengue sa sini nga tuig.
Ang San Joaquin ang una na nga naka-deklarar sang state of calamity bangud sa pagtimbuok sang kaso — tuman kalayo sa sitwasyon sang 2021, kun sa diin sa kaangay man nga June 18 nga morbidity week, isa lang ka kaso ang narekord sa amo nga banwa.
