ILOILO CITY – Personal nga ginpadulungan kag gindul-ong ni Iloilo Governor Arthur Defensor, Jr. ang iya sulat kay Department of Public Works and Highways Secretary Manuel Bonoan nga nagahingyo sa pagbukas gilayon sang Ungka Flyover.
Sa interview sang Bombo Radyo kay Governor Defensor, iya ginpahayag nga pinaagi sa sulat, ginpabutyag niya sa tiglikom kun ano ka importante ang flyover ilabi na gid sa mga taga-central nga porsyon sang probinsya sang Iloilo.
Nagapangayo man si Defensor sang assessment sang departamento kag madali nga pagpaguwa sang engineering interventions.
Nagpangabay man siya kay Bonoan sang madasig nga pagpaguwa sang report sang imbestigasyon sang third party consultant.
Samtang, suportado man niya ang resolusyon sang Pavia Sangguniang Bayan nga nagahingyo sa mga Ilonggo lawmakers nga magpatigayon sang “congressional inquiry” may kaangtanan sa pag-usmod sang Ungka Flyover.
Suno sa gobernador, luyag man niya mahibaluan ang sabat sang opisina ni Bonoan kun ano ang matuod nga rason sa pag-usmod sang imprastraktura.
Gin-athag niya nga indi niya katungdanan sang executive branch nga magpasar sang resolusyon apang ginpasiguro niya nga nagasunod siya sa kawsa sang Pavia nga makahatag sa gilayon sang time table ang central office sang ahensya.
