ILOILO CITY-– Naghatag sang sabat si Iloilo Governor Arthur Defensor Sr. sa nangin desisyon sang Sangguniang Panlalawigan nga indi pag-approve sa mga urgent measures nga iya ginahingyo.
Nahibaluan nga nadesisyunan pinaagi sa majority vote sang Sangguniang Panlalawigan nga i-refer ang mga urgent measures sa nagakaigo nga komitiba kaangay nalang sang Committee on Infrastructures kag Committee on Disaster Risk Reduction and Management.
Sa interview sang Bombo Radyo kay Gov. Defensor iya ginpahayag nga kinahanglanon ang pagpahamtang sang mga water system bangud nagalala na ang tag-ilinit kag ini ang mas kinahanglan sang mga pumuluyo.
Suno kay Gov. Defensor kinahanglan nga maaksyunan gilayun ang mga gina-ayo sang mga pumuluyo agud mabatyagan man nila nga gina-ulikid ang ila kinahanglanon.
Gin-athag man sang gobernador nga wala nila ginalamudan sang pamulitika ang ginahatag nga bulig bilang sabat sa mga ginahingyo nga kinahanglanon sang mga pumuluyo.
Wala man sila nagapahibalot kag nagapamangkot sa mga pumuluyo kun sin-o ang ila ginasuportahan nga mga kandidato.
