Ginalauman nga magtukod sang fact finding committee ang Iloilo Provincial Government agud mag-imbestigar sa natabo nga pagpanghimulos sang isa ka gwardiya sa isa ka masahista sa sulod kapitolyo.
Sa interview sang Bombo Radyo Iloilo kay Provincial Administrator Atty. Suzette Mamon, iya ginpahayag nga ini matapos nakalab-ot na sa talatapan ni Iloilo Governor Arthur Defensor Sr. ang administrative complaint tuhoy sa pagpanghimulos sang Prison Guard II nga si Roen Ledesma sa masahista nga si alyas Jane.
Suno kay Atty . Mamon, pananglitan may bastante kag mapag-on nga ebidensiya batok sa gwardiya, magatukod sang dugang nga kumitiba na magaasikaso naman sa pagpasaka sang kaso administratibo batok kay Ledesma.
Matandaan nga natabo ang ginaalegar pagpanghimulos sang gwardiya sa masahista sa sulod sang opisina ni Board Member Nielo BongBong Tupas sa 6th floor sang Iloilo Provincial Capitol sang Mayo 25.
