ILOILO – May yara na lang kutub buwas nga adlaw, Hulyo 3, ang tanan nga Ilonggo nga makapauli sa Iloilo may kaangtanan sa pagpatuman sang border restrictions kasunod sang pagsaka sang numero sang kumpirmado nga kaso sang Coronavirus Disease 2019 (COVID-19) sa Iloilo.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga wala ginpauntat ang byahe apang istriktuhan lang ang pagpatuman sang border restrictions.
Suno kay Defensor, kun maglapaw na sa Hulyo 3, pagakabigon na nga Locally Stranded Individual ang mga magapauli sa Iloilo gikan sa iban nga probinsya kag kinahanglan nga magpaidalom sa quarantine kag COVID-19 test.
Ginpahayag ni Defensor nga pahanugutan sa gihapon ang pagpasulod sang essential products apang kinahanglan nga mag-agi sa maid-id nga monitoring depende sa lugar nga ginhalinan.
Apisar sang border restrictions, may yara sang exemption kasubong sang frontline workers, authorized person outside residence, government officials nga may yara sang official travel kag ang mga humanitarian kag emergency workers and volunteers.
May kaangtanan diri, magapatuman man sang border restriction ang probinsya sang Capiz.
Sa interview sang Bombo Radyo kay Gov. Esteban Contreras, iya ginpahayag nga kutub na lang sa Hulyo 5 ang igahatag sa tanan nga Capizeño nga makapauli sa Capiz.
Kasubong sa Iloilo, paglampas sa gintalana nga deadline, kabigon man sila nga mga Locally Stranded Individual kag kinahanglan nga magsunod sa quarantine protocol.
Ginpahayag ni Contreras, ini ang labing una nga kahigayunan nga apisar Modified General Community Quarantine na sa Western Visayas apang daw kasubong nga General Community Quarantine sa gihapon ang ginapatuman nga pagsulundan.
Nakahanda si Gov. Rhodora Cadiao nga magsunod sa unified border protocol sa bug-os nga Western Visayas.
Sa interview sang Bombo Radyo kay Cadiao, iya ginpahayag nga sa subong, wala siya sang plano nga magpatuman sang border protocol bangud nga may yara sang moratorium sa paluparan kag sirado naman nga daan ang mga pantalan sa Antique.
Suno kay Cadiao, kun siya lang ang pamangkuton, indi siya magpatuman sang border restrictions sa tunga-tunga sang Antique kag Iloilo apang kun ano ang mahisugtan sang kadam-an sa Regional Development Council 6 meeting, iya ini nga pagasundon.
Ginpahayag ni Cadiao nga indi man mahimo nga palawigon ang border restrictions ilabi pa nga madamo ang natalana nga magapauli kag indi man masarangan sang gobyerno nga sa quarantine facility lang patiniron ang mga Locally Stranded Individuals.
