Ginaengganyo sang Iloilo Provincial Health Office (IPHO) ang publiko nga maglikaw nga mag-ubog sa tubigbaha agud matapikan sang balatian nga leptospirosis.
Ini isa ka bacterial disease nga maangkon paagi sa contact sa ihi halin sa infected nga sapat ukon kontaminado nga palibot.
Nagasulod ang leptospirosis bacteria sa lawas paagi sa pilas sa panit ukon paagi sa mucous membranes sang baba, maty, kag ilong.
Sa interview sang Bombo Radyo kay Dr. Maria Socorro Colmenares-Quiñon, pinuno sang opisina, iya ginpahayag nga importante ang pagpabilin sang katinlo sa balay agud matabog ang mga ilaga kag peste nga nagaistar sa mahigko nga mga lugar.
Nagpahanumdom man si Quiñon nga magpadulong gid sa doktor kun makabatyag sang sintomas sang leptospirosis kaangay sang mataas nga hilanat, sakit sang ulo, muscle pain, nagakurog, nagapula nga mata, nagasakit ang tiyan, kag skin rashes kag iban pa.
Base sa data, humalin Enero 1 tubtob November 16, 2024, ang Iloilo naka- record sang 181 leptospirosis cases kun sa diin apat ang patay nga narecord sa Sara, Barotac Nuevo, Cabatuan, kag Leon.
Ang mga banwa nga may pinakamataas nga kaso subong nga tuig amo ang Janiuay (16), Leon (13, isa ang patay), Oton (12), Alimodian (10), Tigbauan (10), Badiangan (walo), Pototan (walo), San Miguel (pito), Estancia (anom), kag Lambunao (anom).
