ILOILO CITY- Pagahitsuhon pa ni Iloilo City Mayor Jerry Trenas ang mga pagsulundan sa pagpatuman sang general community quarantine sa syudad sang Iloilo.
Sa interview sang Bombo Radyo kay Mayor Treñas, iya ginpahayag nga pagaplastarun pa ang pila ka mga bagay kaangay sang pagsulod sang mga empleyado nga nagikan sa probinsya sang Iloilo kag sa iban pa nga kaiping nga lugar.
Suno kay Treñas, magapabilin man ang protocol nga kun wala sang Enhanced Community Quarantine Pass, indi makasulod ang sin-o man sa syudad.
Pagasundon man suno sa iya ang guidelines nga amat-amatun lang ang pagbalik sang transportasyon sa tagsa ka phases sang general quarantine,lakip na ang pagsunod sa physical distancing.
Magapabilin man suno sa alklade ang pagpatuman sang curfew, samtang naga-amat-amat nga ginabalik sa kinaandan ang sitwasyon
Dugang pa sang natungdan, kinahanglanon ang nagakaigo nga preparasyon agud indi man magulpihan ang syudad kag malikawan ang paglapta sang virus.
