ILOILO CITY – Ginpasakaan na sang kaso si Mayor Jojo de Paula sang Janiuay, Iloilo matapos magpalupok sang armas sa Villa Teresita Inland Resort sa Maasin, Iloilo.
Kaso nga attempted homicide kag illegal posession of firearms ang ginapangatubang sang alkalde.
Sa interview sang Bombo Radyo Iloilo, ginpahayag ni Iloilo Provincial Police Office (IPPO) spokesman C/Insp. Aaron Palomo, ang attempted homicide case batok sa alkalde ang tungod sa biktima nga si Donald Robles, 20, nga naigo sang magpalupok si Mayor De Paula sang 9mm pistol.
Natukiban nga wala sang lisensiya ang armas sang alkalde apang mahimo makapiyansa ang opisyal sa mga ginapangatubang nga kaso.
Sa imbestigasyon sang Maasin Police Station, hubog ang alkalde kag ginkadtuan sini ang grupo sang mga agi sa pavilion bangud luyag sini magkanta sa videoke.
Apang wala ini ginpasugtan bangud gin-arkilahan sang mga bading ang videoke rason nga naglakat na lang ang alkalde.
Sang pahalin na, ginapahayag nga nagpalupok sang armas si Mayor De Paula kun sa diin naigo si Robles.
Bangud sini, ginpulihan kastigo sang mga agi ang alkalde nga sa karon naka-hospital arrest sa Iloilo St. Paul’s Hospital.