ILOILO CITY – Gin-ako ni Iloilo City Mayor Jed Patrick Mabilog nga nagakabalaka ini, kasunod sang kamatayon ni Ozamiz Mayor Reynaldo Parojinog nga una na ginhingadlan ni Presidente Rodrigo Duterte nga may kaangtanan sa iligal nga droga.
Sa interview sang Bombo Radyo Iloilo, ginpahayag ni Mabilog nga nagapati ini nga ang basehan sang national government kun may ginahimo nga tikang ang local government units agud matapna ang iligal nga droga, ilabi na ang mga gintumod ni Presidente Duterte.
Apag ginpahayag sang alkalde nga kampante ini bangud wala man kuno siya nagapabaya sa kampanya batok sa iligal nga droga.
Sa bahin naman ni Mayor Mariano Malones sang Maasin, Iloilo, wala mahadlok ang alkalde.
Sa interview sang Bombo Radyo, ginpahayag ni Malones nga wala sang problema sa iya kun isaylo man sa Iloilo si C/Insp. Jovie Espenido nga sa karon chief of police sang Ozamiz City.
Ginpanindugan sang alkalde nga wala ini nahadlok bangud indi siya drug protector.
Sanday Mayor Mabilog kag Mayor Malones, ang lunsay gintumod sadto ni Presidente Duterte nga mga narco-politician bangud sa pagka-drug protector.