𝗜𝗟𝗢𝗜𝗟𝗢 — Ginkaalarma sang Iloilo Provincial Health Office (IPHO) ang madasig nga pagtimbuok sang kaso sang dengue sa probinsya sang Iloilo sa sulod kamang sang isa ka semana.
Sa interview sang Bombo Radyo kay Dr. Maria Socorro Quiñon, Head sang Iloilo Provincial Health Office, iya ginpahayag nga may 175 ka mga bag-o nga kaso ang na-record sang Department of Health (DOH) sa sulod sang isa ka semana.
Suno kay Quiñon, yara na sa kabug-usan nga 1,462 cases ang na-record sa Iloilo, kon sa diin, lima diri ang mga napatay nga nagikan sa banwa sang Lambunao, Miag-ao, kag Badiangan.
Ginpahayag man sini nga kalabanan sa mga napatay amo ang pamatan-on, nga nagdala man sa Iloilo bilang nagapanguna nga may pinakamadamo nga kaso sang dengue sa Western Visayas.
Ginpaathag man sini nga kinahanglan na nga hatagan sang igtalupangod sang 1,721 ka mga barangay sa probinsya ang balatian nga dengue bangud nagapadayon ini nga nagataas.
Nagpanawagan man ang natungdan nga i-mobilize ang komunidad ilabi na ang mga opisyal sang barangay agud nga magpatuman sang pagpanglimpyo sa mga ugsaran agud nga matapna ang paglapta sang kaso sang dengue.
