ILOILO CITY- Nagapanguna na ang Iloilo sa may pinakamataas nga kaso sang dengue sa bilog nga Western Visayas.
Sa interview sang Bombo Radyo kay Dr. Ma Socorro Quiñon, pinuno sang Iloilo Provincial Health Office, iya ginpahayag nga sa subong, naka-record na sang 1,294 ka mga kaso sang dengue ang probinsya humalin sang Enero tubtob Hunyo.
Suno kay Quinon, sa probinsya, ang may pinakamadamu nga kaso amo ang Lambunao nga may 88; Passi City nga may 69; Oton nga may 67; Badiangan nga may 62 kag Calinog nga may 61 ka mga kaso sang dengue.
May lima naman ka mga casualty sa Iloilo kun sa diin duha ang halin sa Miag-ao, isa sa Lambunao,isa ka Calinog, kag isa sa Badiangan.
Nagpanawagan naman ang Iloilo Provincial Health Office sa publiko nga gilayon magpakonsulta kun may ginasuprer nga sintomas sang dengue.
Nagpahanumdom man nga sundon gid ang 4S strategy nga amo ang search and destroy of mosquito breeding sites, securing self-protection, seeking early consultation, supporting fogging/spraying only in hotspot areas kag ang pag-obserbar sang safety and health protocols.
