Nagapanguna ang Iloilo sa may pinakamataas nga kaso sang HIV (human immunodeficiency virus) sa Western Visayas.
Sa interview sang Bombo Radyo kay Dr. Rodney Labis, Chief, Health Service Delivert Division sang Iloilo Provincial Health Office, iya ginpahayag nga halin 1986 tubtob Septyembre 2024, ang Iloilo ang may na-record nga 1,990 nga kaso sang HIV, kon sa diin, 249 ang nabalhag nga napatay.
Suno kay Labis, kon ikumpara naman ang mga kaso subong nga tuig 2024, mas mataas ini sang nagligad nga 2023.
Ginakabig man sang natungdan nga mas maayo nga indikasyon ang pagsaka sang numero sang amo nga balatian bangud amat-amat na nga na-detect sang ila talatapan kag gilayon nga mabulong.
Nagapati man ang natungdan nga importante nga matumod ang mga indibidwal agud nga indi na mahulog pa sa Acquired immunodeficiency syndrome (AIDS) ang amo nga balatian.
Nahibaluan nga sa 43 ka mga local government units (LGU) sa probinsya, sugod Enero tubtob Setyembre 2024, ang mga banwa nga may mataas nga kaso sang HIV amo ang: Pavia, Sta. Barbara, Barotac Nuevo, Calinog, Oton, kag Pototan.
