Ginkumpirma sang pamunuan sang Iloilo National High School nga wala sang bomba nga nakit-an sa sulod kag palibot sang eskwelahan.
Ginpatigayon sang kapulisan ang pagpangusisa sa area kasunod sang bomb threat nga ginpadala kaina sang kaagahon.
Ginpadala man sang certain “Nestor Villagracia” ang mensahe sa Bombo Radyo Iloilo kun sa diin ginsiling sini nga nagbutang siya sang siyam ka time bombs sa campus. Pahayag sang nag-send sang mensahe, ginbutang niya ang bomba bangud sa indi patas nga pag-tratar sang mga faculty kag staff sa regular class students samtang ginapaboran naman ang special program students.
Sa pag-check sang Bombo Radyo, nakit-an nga bag-o lang nahimo ang Facebook account sang amo nga indibidwal kag isa lang ang nakabutang sa Friends’ List.
Sa interview naman sang Bombo Radyo kay Delura Cecila Fantillo, Principal IV sang Iloilo National High School, iya ginpahayag nga gin-check na sang Explosive Ordnance Disposal (EOD) ang areas kag nadeklarar nga wala sang bomba nga nakit-an.
Suno kay Fantillo, magapadayon ang regular classes subong nga adlaw.
Ginapasiguro man sang eskwelahan nga safe ang mga estudyante kag may dugang lang nga mga pahanumdom nga ipaguwa kadungan sang ila pagsulod sa buluthuan subong nga adlaw.
UNFAIR TREATMENT?
Nagsabat naman ang assistant principal IV nga si Julius Plondaya nga lunsay alegasyon lang ang pahayag sang tawo nga nag-send sang bomb threat subong nga kaagahon.
“Fair treatment kita diri tanan. Probably dira guro [sa rason sang nag-send], just merely allegation lang,” suno kay Plondaya.
Nagpanawagan man ini sa awtoridad nga aktuhan na ang makaalarma nga sunod-sunod nga bomb threats sa mga educational institutions diri sa Iloilo.
Matandaan nga sang nagligad nga semana, may nabaton man nga bomb threat ang University of San Agustin- Basic Education Department samtang duha ka sunod-sunod nga bomb threat man ang nabaton sang Iloilo Science and Technology University. Lunsay ini na-clear sang awtoridad kag nadeklarar nga wala sang bomba.
