Nagpatigayon sang assessment ang administrasyon sang Iloilo National High School, sa La Paz, Iloilo City matapos makitaan sang litik ang pila ka mga building bangud sang linog nga natabo kahapon, Marso 2.
Bangud sini, ginsuspend ang klase kag nagdesisyon ang pamunuan nga indi anay pagpabalikon ang mga estudyante sa eskwelahan para sa patigayunon nga inspeksyon.
Sa interview sang Bombo Radyo kay Delorah Fantillo, Principal IV sang nasambit nga buluthuan, iya ginpahayag nga wala man sang dako nga kabalak-an bangud wala man sang dalagko nga litik nga nakita sa mga istruktura sang eskwelahan.
Suno pa sa iya, na-manage man ang sitwasyon kag ginpatuman gilayon ang nagakaigo nga safety measures para sa proteksyon sang mga estudyante kag personnel.
Sa karon, nakadesisyon na ang eskwelahan nga magabalik na sa normal ang klase buwas nga adlaw, Marso 4 matapos makompleto ang assessment kag masiguro nga safe na ang mga pasilidad sang eskwelahan.
