Nagapadayon sa pagpanawagan ang Iloilo Provincial Health Office (IPHO) sa mga alkalde kag punong barangay nga himuon gid nga prayoridad ang health kag nutrition kag magpain sang bastante nga pondo para sa sini nga mga programa para nga malab-ot sang probinsya ang status nga “malnutrition-free.”
Suno kay Provincial Health Officer I Dr. Wendel Tupas-Marcelo, kinahanglan gid nga may yara sang “sense of ownership” ang local government units kun ipatuman na ang nutrition programs sa ila tagsa ka lugar.
Buot silingon sang “sense of ownership”, indi dapat pagkabigon sang mga banwa nga iya sang probinsya ang nutrition programs kundi dapat man ibutang sa ila local nutrition action plan, magpain gid sang budget, kag siguruhon nga ma-sustain ini.
Importante man suno sa natungdan nga may commitment gid ang local chief executives bangud sila ang nagahimo sang desisyon kag sila ang mas may ihibalo kun ano gid ang nagakatabo sa banwa ukon syudad nga ila gina-serbehan.
Ginpahayag pa sang Provincial Health Office nga augmentation lamang ang sarang nga mahatag sang provincial government, apang ang daku nga bahin sang budget ang dapat gid maghalin sa banwa ukon syudad amo man sa barangay.
Gin-ako man sang talatapan nga apisar sang mga tikang sang Provincial Health Office kag ila partners, daku gihapon nga pagpanghangkat para sa ila nga malab-ot ang status nga “malnutrition-free” sa probinsya.
Ini nga concerns sang talatapan ang ginplastar man kadungan sang pagsugod sang probinsya sang ika-50 nga Nutrition Month celebration nga nagahatag sang importansya sa Philippine Plan of Action for Nutrition (PPAN) sa pagduso sang nutrition security para sa tanan.#
(Original article: Balita Halin sa Kapitolyo)
