ILOILO CITY — Ginahikotar na sang Iloilo Police Provincial Office (IPPO) ang posible nga mabulig sang ahensya sa nabilin nga pamilya ni Police Major Sullen Dominggo.
Ini kasunod sang pagtaliwan sang pulis matapos nga nabungguan sini ang isa ka estudyante nga nagatabok sa Diversion Road nga sakop sang Brgy. Sambag, Jaro, Iloilo City.
Sa interview sang Bombo Radyo kay Police Major Rolando Araño, Spokesperson sang Iloilo Police Provincial Office (IPPO), iya ginpahayag nga ginakasubo sang ahensya ang gulpiyada nga pagtaliwan sang ila katapo.
Suno kay Araño, ginakabig nga dako nga bulig sa ahensya kag komunidad ang nangin serbisyo ni Dominggo sa sulod sang 21 ka tuig bilang isa ka pulis.
Ginpahayag man sang natungdan nga pulo ka tuig nagserbisyo sa IPPO si Dominggo, sa diin nagserbe bilang chief sang supply office kag in-charge sa logistic supply sang ahensya.
Nahibaluan nga sa sulod sang masobra duha ka dekada, nangin hepe si Dominggo sang Barotac Viejo Municipal Police Station, Batad Municipal Police Station, Cabatuan Municipal Police Station, Alimodian Municipal Police Station, kag ang pinakauli sa San Miguel Municipal Police Station.
