ILOILO – Nagapanguna ang Iloilo Police Provincial Office sa Unit Performance Evaluation Rating sa bulan sang Abril.
Nahibaluan nga nakuha sang opisina ang 96.45% nga rating sa diin nalabawan sini ang walo ka iban pa nga police offices.
Nagapangaduha naman diri ang Negros Occidental Police Provincial Office nga may rating nga 96.23%, kag Iloilo City Police Office nga nakakuha sang 94.88%.
Sa interview sang Bombo Radyo kay Police Colonel Ronaldo Palomo, director sang Iloilo Police Provincial Office, iya ginpahayag nga nagpanikasog gid ang opisina pinaagi sa pagtutok sa mga operational kag administrative campaigns sang Philippine National Police.
Suno kay Palomo, ini ang nagapakita lamang sang maayo nga panerbisyo sang police personnel sa idalom sang iya liderato.
Ginpahayag dugang sang natungdan nga nga magapadayon ini agud mahatag ang maayo nga serbisyo sa mga pumuluyo sang probinsya sang Iloilo.
