ILOILO– Ginahimo sang Iloilo Provincial Government ang tanan nga masarangan agud masigurado nga maprotektahan ang mga pumuluyo batok sa Coronavirus Disease 2019 (COVID-19).
Sa interview sang Bombo Radyo kay Iloilo Governor Arthur Defensor Jr., iya ginpahayag nga apisar gina-istoryahan ang second wave sang virus sa Metro Manila, diri sa probinsya sang Iloilo, ginahimo man ang tanan agud nga indi na malab-ot ang nasambit nga estado.
Suno kay Defensor, padayon ang restrictions sa probinsya agud malikawan ang paglapta sang virus kag apisar nga nagapabilin ang quarantine, ginpahanugutan na ang pagbukas sang negosyo kag ang pagbalik sang trabaho.
Pagatutukan kag padayunon man ang mga proyekto sa imprastruktura kun sa diin nakapakig-angot na sa national government kag National Economic and Development Authority ang provincial government.
Magluwas diri, buligan man sang provincial government ang sektor sang Agrikultura agud liwat nga makabangon ang ekonomiya sang Iloilo.
