ILOILO CITY- Ginpasa na sang Iloilo Provincial Goverment sa Inter-Agency Task force ang resolusyon kag League of Municipalities sa Probinsya sang Iloilo, kun mahimo mapahanugutan ang angkas sa motorsiklo kag ang dugang nga pasahero sa mga tricycle nga nagabyahe sa Probinsya.
Sa interview sang Bombo Radyo kay Iloilo Governor Arthur Defensor Jr., iya ginpahayag nga may yara na sang apela ang mga Mayors, kag pagahulaton ang mangin sabat sang task force sa resolusyon.
Suno kay Defensor, ang isyu tuhoy sa tricycle kag motorsiklo ang pareho, bangud sa tricycle isa lang ka pasahero ang ginapahanugutan, samtang isa lang man ang dapat sakay sang motorsiklo, kag ginadumilian ang pag-angkas bisan katapo pa sang imo pamilya.
Pahayag pa ni Defensor, indi lang ang mga alkalde sa probinsya sang Iloilo ang nagahingyo nga kuntani pahanugutan ang dugang nga
pasahero sa tricycle kag angkas sa motor kundi mangin sa bug-os nga Pilipinas.
Nahibaluan nga madamo sang mga commuters ang nagareklamo bangud, sa kamahal sang pletehan sa mga tricyle sa diin isa lang ang mahimo makasakay, samtang madamo man sang nagreklamo kag nahul-an nga mga pumuluyo bangud indi mahimo makaangkas sa motorsiklo ang katapo sang pamilya.
