ILOILO CITY – Nagpagwa sang hotline numbers ang Iloilo Provincial Government nga mahimo pakig-angutan sang mga stranded nga Overseas Filipino Workers lakip man ang mga stranded domestic tourist kag local stranded residents.
Ang mga numero sang mga talatapan nga mahimo nila pakig-angutan amo ang masunod;
- Office of the Provincial Tourism para sa mga stranded domestic tourist sa numero nga 338-4910.
- City Disaster Risk Reduction Management Council para sa mga returning local stranded residents sa numero nga 09208575910 ukon 337-3605.
- Public Employment Service Office para sa mga magapauli nga Overseas Filipino Workers sa numero nga 09616804428 ukon 328-7977 kag Provincial Health Officer 335-1894 ukon 509-0895
Sa interview sang Bombo Radyo kay Francisco Heler Jr., pinuno sang Philippine Employment Service Office – Iloilo iya ginpahayag nga masobra na sa 600 ang mga Overseas Filipino Workers ang nakig-angot sa ila paagi sa ila hotline numbers.
Suno kay Heler, nakig-angot na sila sa Overseas Workers Welfare Administration agud matigayon na ang pagpapauli sang mga stranded nga OFW kag iban pa.
Nahibaluan nga natalana nga magpauli subong nga adlaw sa Panay ang 66 ka mga Overseas Filipino Workers sa diin 24 sa ila ang gikan sa probinsya sang Iloilo.
Base sa ginpagwa nga manifesto sang Overseas Workers Welfare Administration, may yara sang tag isa ka repatriates nga magapauli ang banwa sang Ajuy,Balasan, Dingle, Miag ao, Mina, Passi, Pavia, Pototan,Tigbauan kag San Joaquin, duha naman ka repatriates ang gikan sa Calinog, Carles, Oton kag Sta Barbara, tatlo sa Lambunao kag lakip man ang isa pa nga OFW nga ginahibalo pa ang address.
