Nagapadayun ang preparasyon sang Iloilo Provincial Government para sa posible nga epekto sang El Nino sa tubig, pagkaon, ikaayong lawas, enerhiya kag public safety.
Kasunod ini sang ginpatigayon nga pagsinapol kahapon nga adlaw, Oktubre 6, sang Iloilo Province El Nino Task Force.
Sa interview sang Bombo Radyo kay Cornelio Salinas, head sang Iloilo Provincial Disaster Risk Reduction and Management Office (PDRRMO), iya ginpahayag nga luyag ni Governor Arthur Defensor Jr. nga may klaro nga day-to-day ukon weekly response kag mitigation measures ang tagsa ka sektor.
Suno sa iya, indi lang response sa tion sang problema ang ila pagatutukan, kun indi amo man ang prevention, mitigation, kag preparedness agud mahagan-hagan ang epekto sang El Niño.
Ginpakigbahin man ni Salinas nga indi lang drought ukon El Niño ang ginapreparahan sang probinsya kun indi ang mga magasunod man nga bulan kun sa diin magasugod ang summer season.
Lakip na diri ang bulan sang Abril, Mayo, kag Hunyo kun sa diin masami man nga apektado ang suplay sang tubig.
