Palawigon pa ang modified enhanced community quarantine (MECQ) status sa probinsya sang Iloilo umpisa bwas, Hulyo 1 tubtob sa Hulyo 15.
Ini ang kasunod sang ginpapanaog nga Executive Order No. 222 ni Iloilo Governor Arthur Defensor Jr.
Yari ang mga nasaad kag pila ka mga pagbag-o sa amo nga pagsulundan base sa direktiba sang Inter-Agency Task Force:
- Pahanugutan lamang ang take out kag delivery services sa tanan nga restaurant kag iban pa nga public dining;
- Ginadumilian ang operasyon sang bars, theaters, cinemas, internet cafes, amusement arcades kag playgrounds;
- Ginadumilian ang tanan nga contact sports kag game activities;
- Pahanugutan lamang ang outdoor exercises within barangay, subdivision ukon village;
- Ginadumilian ang operasyon sang tanan nga personal care services kaangay sang barber shops, beauty parlors, cosmetic ukon derma clinics kag massage therapy kalakip na ang home service sang mga nasambit nga aktibidad;
- Ginadumilian ang operasyon sang fitness studios, gym kag spa;
- Ginapahanugutan ang outdoor sports sa gwa lamang sang balay ukon outside residence;
- Ginadumilian ang cockpits, pabulang kag iban pa nga gaming establishments;
- Dulaon na ang border control sa diin indi na kinahanglan pa ang travel pass sa pagwa kag pasulod sa probinsya;
- Dulaon na ang liquor ban;
- Pahanugutan ang Religious gathering sa 30% capacity;
- Ginalimitahan sa lima ka-adlaw ang pagpatigayon sang haya sa diin ang immediate family lamang ang ginapahanugutan nga magtambong pati na sa lubong;
- Buksan ang resorts kag recreational venues para lamang sa mga returning overseas Filipinos nga i-quarantine apang siraduhon ang recreational facilities;
- Ipatuman ang curfew umpisa 9pm – 4am; kag
- Ginadumilian ang tanan nga public events kag gatherings kaangay sang fiesta, festivals, birthday, anniversary, wedding, baptismal celebrations kag receptions
Sa interview sang Bombo Radyo kay Iloilo Provincial Administrator Atty. Suzette Mamon, iya ginpahayag nga gincomply na sang probinsya ang IATF resolution nga gintumod sang Department of Interior and Local Government.
Ini amo ang pagdumili sang operasyon sang tanan nga personal care services sa mga lugar nga nakapaidalom sa MECQ status.
Suno kay Mamon, ipabilin sang probinsya ang pagpatuman sang hugot nga mga pagsulundan kalakip na ang tanan nga health protocol sa idalom sang MECQ status.
