ILOILO CITY – Nalakip ang Iloilo Province kag Iloilo City sa mga lugar nga yara sa Low Risks Areas kun Coronavirus Disease 2019 (COVID-19) ang pagahambalan.
Sa ginpatigayon nga press briefing, ginpahayag ni Presidential Spokesperson Atty. Harry Roque nga nalakip ang syudad kag probinsya sang Iloilo sa Low Risk areas.
Buot-silingon suno kay Roque, umpisa Mayo 16, indi na kinahanglan nga ipaidalom sa Community Quarantine ang mga lugar nga yara sa nasambit nga kategorya.
Magluwas sa Iloilo Province kag Iloilo City, kabahin man sa mga nalakip sa Low Risk Areas sa Western Visayas amo ang:
Aklan, Antique, Capiz, Guimaras, Negros Occidental kag Bacolod City
Lakip man sa kategorya amo ang Enhanced Community Quarantine, General Community Quarantine kag may yara man sang mga lugar sa Low Risk Areas nga subject for review.
May kaangtanan diri, mangin amat-amat lang ang pagdula sang quarantine restrictions agud nga masigurado nga mauntat na ang paglapta sang virus.
Sa interview sang Bombo Radyo kay Atty. Roy Villa, tagpamaba sang Regional Inter-Agency Task Force, iya ginpahayag nga ang Low Risk Areas ang kwalipikado na nga magpatuman sang exit plan santo sa guidelines gikan sa Local Government Unit kag sang Regional Inter-Agency Task Force apang may yara sa gihapon sang restrictions nga dapat sundon.
Isa sa halimbawa suno kay Atty. Villa amo nga umpisa Mayo 16, may yara na sang byahe sang transportasyon, mas madamo na nga negosyo ang pahanugutan nga magbukas apang kinahanglan sa gihapon nga sundon ang physical distancing, pagsuksok sang mask kag proper hygiene.
Sa sini nga paagi suno sa natungdan, malikawan ang 2nd wave sang COVID-19.
Yari ang kabug-usan nga listahan sang mga lugar nga nalakip sa Low, Medium kag High Risk Areas:
Sa Low Risk (No Community Quarantine)
a. Region I
b. Region IV-B
c. Region V
d. Region VI
e Region VIII
f. Region X
g. Region XII
h. Autonomous Regional in Muslim Mindanao
Sa Moderate (General Community Quarantine)
a. Region II
b. Region III
c. Region IV-A magluwas sa Laguna
d. Cordillera Administrative Region
e. Region VII magluwas sa Cebu
f. Region IX
g. Region XI
h. Region XIII
Sa High (Modified Enhanced Community Quarantine)
a. Laguna (Region IV-A)
b. National Capital Region
c. Cebu City (Region VII)
