ILOILO – Wala naka-request sang moratorium sa Inter-Agency Task Force ang Iloilo Provincial Government may kaangtanan sa pagbaton sang Locally Stranded Individuals.
Ini ang ginkumpirma sa Bombo Radyo ni Provincial Administrator Atty. Suzette Mamon kasunod sang ginpaguwa nga Resolution no. 69 kun sa diin nakasaad nga ang bug-os nga Western Visayas, Lanao del Sur kag Iligan City ang naghingyo sang moratorium nga gin-aprobahan naman sang National Chief Implementer Against COVID-19.
Suno kay Mamon, kinahanglan nga may yara sang nagakaigo nga rason sa pag-request sang moratorium apang sa bahin sang probinsya sang Iloilo, napangitaan na sang paagi ang problema ilabi na sa quarantine facility.
Sa pagkamatuod suno kay Mamon, gin-istorya na sadto ni Gov. Arthur Defensor Jr. ang mga airline kag shipping companies agud nga amat-amat nga makapauli ang mga Ilonggo nga na-stranded sa iban nga lugar.
Ginpahayag sang natungdan nga kun may yara sang resolusyon nga ginpaguwa ang Inter-Agency Task Force, wala sang may mahimo ang Iloilo Provincial Government kundi sundon ang nasambit nga mandu.
Ginkumpirma man sa Bombo Radyo ni Iloilo City Mayor Jerry Treñas nga wala siya nakahingyo sang moratorium sa pagbaton sang Locally Stranded Individuals.
May kaangtanan diri, ginpahayag ni Treñas nga iya pa nga sapulon ang COVID-19 team agud istoryahan kun ano ang masunod nga lihok.
Apisar nga nagasaka ang COVID-19 cases sa syudad, ginpahayag sang alkalde nga may yara pa sang bakante nga mga quarantine facility.
Lauman nga buwas nga adlaw, Setyembre 9, ipalayag sang alkalde ang tuhoy sa iya mangin desisyon.
