ILOILO – Magapatigayon sang simulation excercise (SIMEX) ang Probinsya sang Iloilo sa kahandaan sang pag-abot sang ginbakal nga COVID-19 vaccine sa madason nga semana.
Sa interview sang Bombo Radyo kay Iloilo Provincial Administrator Atty. Suzette Mamon, iya ginpahayag nga magasapol ang COVID Vaccination Team kag municipal health officers agud tapuson ang guidelines kag procedures sang aktibidad.
Suno kay Mamon, ini nga SIMEX ang ginatawag nga ‘Time and Motion’ exercise.
Ini ang patigayunon kasunod sang nagapadayon nga immunization sang may balatian nga polyo, rubella, measles, kag pneumonia.
Ginpahayag ni Mamon nga sa tion nga mag-abot na ang bakuna, nagakadapat nga nahitso na ang tanan sa pagpabakuna sang pumuluyo sa probinsya.
Ang SIMEX ang patigayunon sa isa ka banwa sa kada distrito sang Iloilo.
Matandaan nga Disyembre 2020, nagpain sang P95 million ang probinsya sang Iloilo agud ibakal sang 270,000 doses sang AZD1222 Vaccine nagikan sa British-swedish multinational pharmaceutical firm nga AstraZeneca.
