𝗜𝗟𝗢𝗜𝗟𝗢 – Mas pabaskugon pa sang twelve member-agencies sang Regional Inter-Agency Task Force ang ila ginahimo nga tikang batok sa Illegal, Unreported, kag Unregulated Fishing sa Western Visayas.
Ang task force ang ginabug-usan sang Department of Interior and Local Government, Police Regional Office VI, Criminal Investigation and Detection Group, Philippine Coast Guard Western Visayas, Philippine Navy, Regional Maritime Group, National Intelligence Coordinating Agency, Maritime Industry Authority, National Telecommunications Commission, Philippine Fisheries Development Authority, kag Bureau of Customs –Port of Iloilo.
Sa interview sang Bombo Radyo kay Remia Aparri, Regional Director sang Bureau of Fisheries and Aquatic Resources (BFAR) Region 6, iya ginpahayag nga bilang chairperson sang Task Force, nagapangayo sila sang bulig sa tanan nga mga myembro bangud tuman ini kadako nga katungdanan.
Suno kay Aparri, nagapatigayon man sila sang regular nga pagsinapol agud istoryahan ang ila operational plan.
Ginpahayag sini nga sa tion nga indi mapapas ang iligal nga pagpangisda, pat-od nga maganubo ang produksyon sang isda sa rehiyon.
Humalin sang Enero tubtob Setyembre subong nga tuig, nagdangat na sa 42 ang ila mga nadakpan nga nagapatigayon sang iligal nga pagpangisda.
Sa nasambit nga numero, ang Iloilo Province ang may pinakamataas nga may 30, ginasundan sang Negros Occidental nga may 10 kag Guimaras nga may 2.
