Ginplastar ni Iloilo Governor Arthur Defensor, Jr. kun ngaa P95 million lang ang ginpain nga pondo sang probinsya sang Iloilo para sa pagbakal sang bakuna batok sa COVID-19.
Ini ang kasunod sang pag-apruba sang Sangguniang Panlalawigan sa Iloilo sa pagpasakop sa multilateral agreement program sang Department of Health (DOH), national goverment, kag British-Swedish multinational pharmaceutical kag biopharmaceutical company nga AstraZeneca.
Sa interview sang Bombo Radyo kay Defensor, iya ginpahayag nga 271,000 doses sang bakuna ang equivalent sang nasambit nga budget sang probinsya.
“Ngaa amo lang na ang dose naton? Ang aton nga decision is guided by the vaccination of the province,” una nga rason nga ginpahayag sang gobernador.
Ginpaathag man sang gobernador nga “developing” pa lang ang bakuna kag sa subong nga tion, maathag man nga madamo pa nga mga tawo ang nagapamalibad nga magpabakuna.
Sa pagkamatuod, kun basehan ang independent Pulse Asia survey nga ginpagwa subong nga Hwebes, Enero 7, nagagwa anga halos katunga ukon 47 percent sang mga Pinoy ang nagpahayag nga indi sila magpabakuna batok sa COVID-19.
Sa 2,400 ka adults nga gin-survey, 47 percent ang nagpahayag nga i-skip nila ang inoculation, 32 percent ang willing magpabakuna, samtang 21 percent ang undecided. Most popular ini nga opinyon sa Visayas (55 percent); ginasundan sang Mindanao (48 percent); Balance Luzon (46 percent), kag Metro Manila (41 percent).
“At this time nga gina-develop pa lang ang vaccine, indi 100 percent ang acceptance sang mga pumuluyo. Suno sa mga survey, indi tanan ang may gusto (sa bakuna). We still have to educate our citizens. Buot silingon, indi tanan,” paathag ni Defensor.
Ini nga pondo suno sa gobernador ang “rasonable” man nga estimate para sa programa nga “nagaumpisa pa lang”.
“We do not put everything in one basket. Ang vaccine gina-develop siya sa industriya: lain-lain nga manufacturers, lain-lain nga klase. Indi na siya malayo nga matabo sa ulihi nga ang vaccine pareho man na sa face mask kag sa PPE — nga sang una ayawan ka sang pangita… gainagaway. As we go along, madamo pa ina siya. The program will change.”
Apisar sini, ginpahayag sang gobernador nga handa ang Iloilo Provincial Government nga magdugang sang pondo para sa bakuna.
“Pwede bala kita makadugang sa ulihi sang budget? Of course we can!”
Sa subong suno sa iya, hatagan anay sang prayoridad ang mga frontliners ilabi na ang nagatatap sa mga nagaabot nga mga residente sang probinsya nga may travel history sa mga lugar nga may transmission sang COVID-19. Prayoridad man suno sa iya ang mga tigulang.
Ginpahayag man sang gobernador nga indi pa matabo ang 100 percent nga vaccination bangud “wala sang pilitay nga matabo.”
Gin-athag man ni Defensor nga nagasunod lang ang probinsya sang Iloilo sa national government kag ang national government gihapon ang may desisyon kun ano nga lugar ang unahon sa pagbakuna.
Sa subong, handa na suno sa iya ang cold storage facility sang probinsya sa Iloilo Sports Complex kag sa provincial and district hospitals.
“Importante lang nga gaupod kita sa ila kag nagahanda kita,” pahayag pa ni Defensor. #
85854 Comments1 ShareLikeCommentShare
